Assam: Assam CM-in literary award hlan

Assam chief minister Himanta Biswa Sarma chuan December 7, 2024 khan Gauhati University-a litterateur hmingthang fam ta Homen Borgohain piancham 93-na puala hun hmanah, litterateurs pathum hnenah literary pension a hlan a, litterateurs 28 hnenah literary award a hlan bawk.

Literary pension dawngtute hi Shila Mohanta, Cachar, Dilip Kumar, Phukan Sonitpur leh Khagendra Nath Bora, Lakhimpur te an ni.

Chief Minister chuan Borgohain zahna hlanin, Assam literature-a a dinhmun pawimawh zia a sawi a, Literary Pension leh Award dawngtu zawng zawng chu duhsakna a hlan nghal a ni.

Literary award dawngtute hnenah hian pawisa fai Rs 50,000 hlan an ni a, literary pension dawngtute hi thlatin pension hlawh 8,000 an pe dawn thung tih Chief Minister Office chuan a tarlang.

CM Sarma chuan kum zabi 20-na hunlaia Assamese literature tih hmasawn nana ke pen nasa tute zingah Homen Borgohain chu mi challang tak a nih thu a sawi a, encyclopaedia hmanga Assamese literature a tih hausak dan chu tluktu an awm tawh lo a ni, a ti. Assam sorkarin hnam ṭawng humhalh kawngah hma nasa taka a lak thu a sawi bawk a, hnam ṭawng a bo chuan hnam ziarang tluchhe thei dinhmunah a ding a ni, tiin a sawi. Assamese ṭawng classical language status pek chu hmasawnna ropui tak a nih thu Sarma chuan a sawi bawk.