LAC-ah BOP 42 hawn belh a ni ang: Rijiju

Union Minister of State for Home Affairs Kiren Rijiju chuan Arunachal Pradesh leh Sikkim-a China ramri venhimna tihchangtlun nan Line of Actual Control (LAC)-ah border outpost (BOP) hawn belh a nih tur thu a sawi.

BOP hawn tharah hian Indo-Tibetan Border Police (ITBP) te dah an ni ang a, Arunachal-ah 37 leh Sikkim-ah panga hawn a ni ang.

Prime Minister Narendra Modi sorkar kum khat tlin lawmna pualin Rijiju chuan Nilaini khan Union Minister of State for Sports and Youth Affairs Sarbananda Sonowal nen Guwhati-ah thu­thar thehdarhtute an kawm a, BOP chuan ramri venhimna a tih­changtlun bakah tuna BOP awm mekte inkar hlat zawng kilometre 40 aṭanga 50-a thui chu a tihtawi phah dawn a ni, a ti.

"BOP hi ramri chhehvel khaw mipuite pawhin an ṭangkaipui dawn a, venhimna petu sipaite chuan a thlawnin mipuite chu ei tur an pe ṭhin ang," a ti.

Hmarchhak biala helte laka beihpui thlak mekah Rijiju chuan sorkar kuta hel inpete chu sorkarin chhawmdawlna pek zel a tum thu a sawi a, mahse inremna thuthlung palzutte chu ngaihdam an nih loh tur thu a sawi.

"Hel inpe ṭhahnem tak ka kawm tawh a, remna tluantling awm theihna atana sorkar hma­lak dante ka hrilh tawh a ni. Thuthlung kan siam angin hel inpete chu an camp pawn lamah silai hman phalsak an ni lo," a ti.

Rijiju chuan SS Khaplang-a kaihhruai, NSCN (K) helte'n inkahhai thuthlung an titawp chu Union Home Ministry-in pawi a tih thu sawiin, hmarchhak biala dan leh thupek dinhmunin an tawrh phah a ni, a ti.

Rijiju chuan Delhi Police atana hmarchhak ṭhalai lak chu sorkar laipui policy pakhat a ni tih sawiin, Central Industrial Security Force (CISF) Inspector General office pawh Kolkata aṭanga Guwahati-a sawn a nih tur thu a sawi bawk.

"Delhi police-ah mi 90,000 vel an awm a, heng zinga mi 43 chauh chu hmarchhak mi an ni, Delhi-ah hmarchhak mi tam tak an awm a, hei vang hian Delhi police-ah pawh mi tam zawk an awm a ngai a ni," a ti.

Hmarchhak mite venhimna kawnga Bezbaruah committee-in rawtna a lo siam tawh, CBSE leh UGC curriculum-a hmarchhak mite history, geography leh culture chungchang telh chu sorkar laipui pawhin a pawmpui thu Union Minister Rijiju chuan a sawi a, UGC chu Post Graduate level thlenga hmarchhak chanchin telna subject telh tura sorkar laipuiin a hriattir tawh thu a sawi.

Delhi University hnuaia college te leh Jawaharlal Neh­ru University (JNU) te chu hmar­chhak mite awmna tur, hostel siam a, seat 50% hauhsak nghal tura an ngen thu Rijiju chuan a sawi bawk.

Hetihlai hian Delhi-a Jamia Millia Islamia University pawhin hmarchhak bial mipuite leh India mipuite inkar zau lutuk tihzim nan Northeastern studies-ah academic session thar aṭangin post graduate programme kalpui tumin hma a la mek tih DoNER Minister Jitendra Singh chuan a sawi.

"Northeast study leh research mumal taka kalpui chuan hmar­chhak bial hmasawnna atana ruahmanna duan kawngah mi­thiam leh policy maker te nasa takin a pui dawn a ni," tiin Do­NER Minister chuan a sawi.