NE CM te'n special category status ngen chhunzawm zel
NDA sorkarin 14th Finance Commission rawtna anga hmarchhak state te special category status a hlihsak chungchangah hmarchhak state Chief Minister te chuan special status-a dah leh phutin Prime Minister Narendra Modi an nawr chhunzawm zel.
Nagaland Chief Minister TR Zeliang chuan tunhnaia Prime Minister Modi nen meeting an neih ṭumin, hmarchhak bial chu ram chhengchhe tak tak leh chanchin khirh tak tak nei a nih avangin India ramin zalenna a neih aṭanga kum 68-naah pawh India ram state dangte ruala hmasawn thei a nih loh thu sawiin, a bik taka sorkar laipui ṭanpuina a mamawh thu a sawi.
Hmarchhak state pariata Chief Minister te chuan special status hlih chungchangah a hmain Prime Minister Modi chu lehkha thawin, inrawlh turin an lo ngen tawh a, hei bakah hian Tripura Chief Minister Manik Sarkar kaihhruaina hnuaiah joint resolution an lo siam tawh bawk.
Hmarchhak state Chief Minister ṭangrualte chuan, 14th Finance Commission rawtna angin state zawng zawngin central tax aṭangin 42% an dawn tur thu tarlangin hei bak central fund dang an dawn loh chuan hmarchhak state te chu state hmasawn tawh, Maharashtra leh Gujarat ruala an kal theih loh tur thu PM Modi hnena lehkha an thawnah an tarlang.
"Union Budget 2015-16 chuan Normal Central Assistance (NCA) leh Special Central Assistance (SCA) hnuaiah fund hmuh tur eng mah a tarlang lo a, hei vang hian sum leh paiah hmarchhak state te'n an tawrhphah dawn a ni," tiin Nagaland CM Zeliang chuan Prime Minister Modi a hrilh bawk.