Tripura-in JE vaccine lak hnua thihna chhui turin ngen

Tripura sorkar chuan West Tripura district-a natna hrileng chi khat, Japanese Encephalitis (JE) hri danna damdawi (vaccine) lak hnua naupang pathum thihna thleng chu chhui chiang turin Union Ministry of Health and Family Welfare a ngen.

State Health Secretary M Nagaraju chuan Union Ministry of Health-a lehkha a thawnah JE vaccine avanga thihna thleng chu Tripura-a mithiam tira chhui tir turin a ngen a, naupang pathumte thihna chu chhan hrang hrang vang nia sawi ni mah se naupangte hi JE vaccine an lak hnua damlo leh damdawi ina enkawl vek an ni, a ti a, an nat dan pawh a inang tlang deuh vek a ni, a ti.

JE vaccine hi mithiamte chuan a him tawk niin an sawi a, he natna hri dan nan khawvel pumah hman a ni.

Union Ministry of Health hmalakna hnuaiah hri danna hi Tripura district pathum- West Tripura, Sepahijala leh Khowai district ah te kar hnih kalta khan pekchhuah a ni a, naupang kum khat aṭanga kum 15 inkarte pek an ni.

Clinical report tarlan danin naupang thi zinga pakhat, Kamalasagar-a mi chu JE vaccine nena inkaihhnawihna nei lo, sentut (measles) vangin a thi a, Sonamura khuaa mi erawh taksa peng hrang hrang na vangin a thi a, Mandai khuaa mi erawh AMRI damdawi-in, Kolkata-ah a thi a, a thihchhan erawh hriat a ni lo.

Hetihlai hian Tripura sorkar chuan naupangte thihna thleng chungchangah departmental committee dinin, a chhui chiang mek a, kar khat hnuah report a thehluh beisei a ni.