Meghalaya-in maggi a test tir

India ram state ṭhen­khatin Nestle India siam, maggi chu lead leh Mono­sodium Glutamate (MSG) content a san lutuk vanga mihring tana him lo nia sawiin hralhchhuah an khap hnuah Meghalaya sorkar chuan maggi sample chu Guwahati-ah laboratory-ah enchian atan a thawn.

Meghalaya Food Sa­fety Commissioner Y Tsering chuan he thu hi sawiin, maggi sample chu zirchian atan laboratory rintlak takah an thawn a ti a, a result an hriat theih thuai a beisei thu a sawi.

Maggi hi Delhi, Uttar Pradesh leh Kerala chuan an state chhungah hralhchhuah an khap tawh a, Haryana, West Bengal leh Maharashtra pawh a sample an endik mek a ni.

Meghalaya Food Safety Deputy Commissioner SN Sangma chuan district tin aṭanga lakkhawm maggi sample 17 chu enchian atan Guwahati-a Public Health Laboratory-ah an thawn thu a sawi bawk a, report an nghak mek a ni, a ti.

Hetihlai hian Shillong-ah chuan maggi hi la hralhchhuah reng a ni a, state sorkar chuan result a hriat hma chuan khap a tum loh thu leh mipuite chu result hriatchian hma chu fimkhur rih turin a ngen.

Uttar Pradesh-a Food Safety and Drug Ad­ministration chuan maggi sample a enfiahnaah lead content chu dan phal chin 2.5 parts per million aia tam, 17.2 parts per million hmuh a ni a, a tihhanna atana hman, MSG hman a nih thu hi maggi pack-ah tarlan a ni lo bawk.