Meghalaya-ah India rama Piggery Mission lian ber kalpui dawn

India rama Piggery Mission lian ber, Meghalaya-a kalpui tur chu union minister of state for agriculture and farmer's welfare, Kailash Choudhry chuan Ningani khan a tlangzarh. 

He project hi National Cooperative Development Corporation (NCDC) hnuaiah kalpui a ni dawn a, cheng vaibelchhe 209 ruahman a ni. Project hi chhungkaw 2,500 velin an chhawr thei dawn a, Meghalaya chu vawksa leh vawksa aṭanga thil siam chhuah kawngah a intodelh thei dawn a ni. 

Project tlangzarhna inkhawm hi Delhi-a NCDC headquarters-ah neih a ni a, union minister bakah chief minister Conrad Sangma leh deputy chief minister Prestone Tynsong te pawh an tel. He hunah hian project thawhna tur atana1st installment Rs vbc 52.36 pek chhuah nghal a ni. 

CM Sangma chuan 'State Piggery Mission' hnuaiha an state-a vawk vulhtute chu free loan pek an ni dawn a, an loan punna hi sate sorkar chuan a tumsak dawn a ni, a ti. 

Meghalaya sorkar chuan an state khawpui, Shillong-ah Ropeway siam a tum a, hemi siamna atan hian budget cheng vaibelchhe 84 a ruahman. 

Chief minister Conrad Sangma chuan Shillong Ropeway siamna atana Rs vbc 84 ruahman a nih thu sawiin, work order tih­chhuah aṭanga thla 18 chhunga zawh fel hman tum a nih thu a sawi. Ropeway siamna tur hi official-a puanzar la ni lo mah se, Shillong Peak leh Cleve Colony-a Tripura Castle inkarah siam tum nia sawi a ni. 

Sangma chuan Ropeway siamna tur atana ram tihfel ngaite pawh tun thla chhungin a buaipuite department lamin an zawh fel tur thu leh, hna thawh ṭan thuai a nih tur thu a sawi a ni.