Tripura-ah Covid-19 vangin ni khatah mi paruk thi

Tripura-ah Nilaini khan Covid-19 vangin mi paruk an thih belh leh a, hemi ni vek hian hri kai hmuh chhuah thar mi 535 an awm bawk. 

Tripura-ah hian Covid-19 thihpui mi 172 an awm tling tawh a, thi zinga mi 88 chu state khawpui, Agartala awmna, West Tripura district huam chhunga mi an ni. 

Tripura state-a hri vanga thi zat rate hi 1% niin, hri kai enkawl dam rate hi 59.41%  a ni a, hmarchhak state zingah recovery rate hniam ber a la ni. Hri kai hmuh chhuah tawh hi mi 17,281 an tling tawh a, an zinga 10,255 chu enkawl dam an ni tawh. 

State chhunga hri lengin zual lam a pan zel avanga sorkar laipui puihna an dil hnuah, sorkar laipuiin expert team a tirhte chuan Tripura hi an thleng tawh a, ni 10 chhungin chamin district hrang hrang an tlawh kual ang. 

Official chuan central team hian district-te an tlawh kual hnuah, state senior official-te chu meeting an neihpui dawn tih sawiin, union health and family welfare ministry leh Tripura health department hnenah report an thehlut dawn a ni. 

Law and education minister Ratan Lal Nath chuan an state-a hri kai an pun belh zel avangin union home ministry  hnenah pawh total lockdown puan leh an rawt a, mahse ministry lam hian an la chhang lo tih a sawi.  

Chief minister Biplab Kumar Deb chuan mi nuai nga chuang chenna, Agartala Municipal Corporation (AMC) huam chhunga hri kai pun chak dan chu a hlauhthawnawm tawh hle tih a sawi. AMC-a ward 10-a hri kai hmuh chhuah chu state puma hri kai zinga 70% an tling pha a ni. 

CM hian hri leng dona kawnga hma lak dante enfiahin hmun hrang hrang a tlawh kual a, district 10-a health infrastructure-te pawh thuam ṭhat zel an nih thu a sawi.