Nagaland: Hornbill festival-ah advent Kristmas hmang

Nagaland-a Hornbill Festival vawi 25-na neih mekah, Pathianni, December 8 khan Naga Herigate Village, Kisama-ah Nagaland Joint Christian Forum (NJCF) buatsaihin a vawi khatna atan Advent Krismas hman a ni. Khualzin leh tualchhung mite chu Krismas boruakin a chiah hneh tawh hle.

Chief Minister Neiphiu Rio chuan he inkhawm hi a hmanpui a, Krismas boruak leh festival an lawmna chuan inzawmna ṭha tak a neih thu a sawi a, kumina an hun hman chu Hornbill Festival kum 25-na nen a in nan chiah avangin a hlu zual hle tih a sawi.

CM Rio chuan he hun buatsaihtuten special devotion service an siam chu a fak thu leh a lawm thu a hrilh a, inhmangaihna, inlungrualna leh inhriatthiam tawnna thlen ngei se a duh thu a sawi bawk.

Rio chuan mipuite hnenah Krismas awmzia sawifiahin, remna leh muanna bakah chhandamna khawvela thlentu Isua Krista pianni a ni tih te a sawilang. Kristmas chu rinna kawngah te, hnam ziarang leh hmanlai thil chhawmnun kawngah mipuite hruaikhawmtu a nih thu a sawi bawk.

NJCF Advisor, Rev Dr Zelhou Keyho chuan Krismas thuchah sawiin Krismas mawina ber chu Pathian fak leh chawimawi a ni a ti. Krismas chu mitin tan ani a, mi hausa, rethei, khualzin leh ramchhung leilung fate zawng zawng tan a nih thu a sawi bawk.

He inkhawm buatsaihah hian kohhran hrang hrang aṭangin Krismas carol neih ani a, Hornbill Festival chhimtu zawng zawngte pualin ṭawngṭaina hun an hmang bawk a ni.