Meghalaya: Nakkum Feb-March ADC inthlan nei dawn

Meghalaya sorkar chuan district council inthlan chu kumthar February emaw March thla tirah emaw buatsaih a tum. State board exam ti buai lo zawnga inthlan hi neih turin an rel a ni.

Khasi Hills leh Jaintia Hills-a Autonomous District Council pahnih term hi kumin May thla kha a tawp hun a ni tawh. Mahse constituency siamrem chhoh a nih avangin an term hi ṭum hnih thla ruk atan pawhsei sak an ni.

Governor CH Vijayashankar-a'n tun hnaiah KHADC (Constitution of District Council) (Amendment) Rules 2024 leh JHADC (Constitution of District Council) Amendment Bill 2024 te a pawm tak avangin, district council inthlan hi buatsaih tur hian a inpuahchah chho ta a ni. He inthlanah hian constituency siamrem thar angin neih a ni bawk ang.

Political party hrang hrangte chu autonomous district inthlan neih tur atan hian an inbuatsaih ve nghal bawk. Voice of the People Party (VPP) chuan KHADC leh JHADC-a constituency 29-a an candidate tur pawh an puang tawh a, National People's Party (NPP) pawhin candidate list hmasa ber an puang tawh bawk.

Party dang United Democratic Party (UDP), Hill State People's Democratic Party (HSPDP), Bharatiya Janata Party (BJP), Trinamool Congress leh Congress te pawhin an candidate tur hi an puan thuai rin a ni.