Manipur: FOCS in internet service chhunzawm phut

Federation of Civil Societies, Manipur (FOCS) chuan tualchhung buaina thleng vanga state chhunga internet service tihtawp mek chu sut turin thuneitute an phut a, nitin nuna internet pawimawhna te an sawi lang bawk.

Internet service hi November 11-a Borebekra Sub-Division, Jiribam District-a buaina leh inbeihna a thlen hnu aṭang khan tih tawp a lo ni tawh. Hemi ṭuma buaina chhuakah hian nutling pathum leh naupang pathum in nunna an chan a ni.

He inbeihna thleng denchhen hian thuneitu lam chuan chanchin dik lo thawnchhuah a nih loh nan internet service an ti tawp nghal a ni.

FOCS chuan internet tih tawp hian economy mai bakah state chhunga social sector hrang hrangah harsatna a thlen thu an sawi. Mimal chauh ni loin sumdawnna leh hnathawhna kawngah nghawng nasa tak a neih thu an thuchhuahah an tarlang.

"Internet service tih tawp hian tualchhunga entrepreneur, professional leh sumdawngmi te ah harsatna nasa tak a thlen mek a; inbiakpawhna, pawisa inthawn leh hnathawhna kawng thlengin a ti buai a ni," an ti. Hei bakah hian Manipur state chhunga zirna, healthcare leh sumdawnna a tih ṭhuanawp thu an sawi bawk.

Mahse Manipur sorkar erawh chuan internet tih tawp hi dan leh thupek kenkawhna pawimawh tak niin a ngai thung.