Army convoy lambunah sipai 20 an thi Union Home Minister Singh-a'n high level meeting a ko

Manipur, Chandel dis­trict-ah Ningani khan hel­pawlte'n Army convoy an lam­bun a, sipai 20 an thih bak­ah mi 11-in hliam an tuar.

Sipaite hi 6 Dogra Regi­ment te an ni a, Manipur-a Meitei helpawl, People’s Li­be­ration Army (PLA) leh Kanglei Yawol Kanna Lup (KYKL) te chu pawi­khawihtua rin an ni.

Army thupuangtu, Col Ro­han Anand chuan, 6 Dogra Regiment team te hian nitina an tihdan pangngai angin kawngpuiah patrol-in an chhuak a, helte chuan kawng lakah lo lambunin, improvised explosive device (IED) bomb an tihpuah hnuah rocket-propelled grenades (RPG) leh automatic weapon-in an kap zui a ni, a ti.

"Lambunnaah hian 6 Dogra Regiment-a sipai 20 an thi a, 11-in hliam an tawrh bakah hel nia rin pakhat kahhlum a ni bawk," tiin Col Anand chuan a sawi.

Manipur Home Secretary J Suresh Babu chuan sipaite lambunna chu KYKL hel te leh PLA hel ṭangrualte thiltih a nih rin thu a sawi a, thu chiang zawk chhui chian mek a ni, a ti. Mahse Army te chuan KYKL chu a bultumtu an nih an rin thu an sawi thung.

Sipaite lambun na hi Chandel district, Paralong leh Charong khaw inkarah a ni a, India leh Myanmar ramri aṭangin kilo­metre 15 - 20 vela hla a ni.

Hetihlai hian NSCN (K), ULFA (I), Kamatapur Liberation Organization (KLO) leh NDFB (Songbijit) hel ṭangrual pawl, United Liberation Front of Western South East Asia (ULF­WSEA) chuan sipai lambun chu an tih niin an chhal.

He thu hi ULFA (I) hotu, Paresh Baruah chuan Assam-a television channel te biain a sawi a, ULFWSEA chairman, SS Khaplang-a thupek bawhzuiin, sipaite chu lambun an ni, a ti.

Army convoy lambun a nih hnu hian Manipur-a security force te chuan helte dapchhuah beihpui an thlak nghal a, India-Myanmar ramri chu helte danchep nan khar vek nghal a ni.

Manipur-a thilthleng chung­changah Union Home Minister Rajnath Singh chuan high level meeting a ko nghal a, Defence Minister Manohar Parrikar, Army Chief Dalbir Singh Suhag, Nation Security Advisor Ajit Doval leh MHA senior official te an tel.

Meeting-ah hian Mani­pur-a dan leh thupek dinhmun te ennawn nghal a ni a, Union Home Minister Singh chuan pawikhawihtute chu hrem loha chhuah an tum loh thu a sawi.

Union Home Ministry chuan 6 Dogra Regiment te chunga thilthleng chu a ngai thutak hle a, Manipur leh Nagaland-a security force te chu inralring renga awm turin a hriattir nghal bawk.

Prime Minister Narendra Modi pawhin Manipur-a thil­thleng chu a dem thu sawiin, ram tana nun hlantu, sipai thi tate chungah zahna a lantir bawk.

Congress president Sonia Gan­dhi pawhin helte thiltih chu dawhzepthlak a tih thu sawiin, sipaite thi tate tan rorelna dik hlen­chhuah ngei a beisei thu a sawi.