Manipur-a kawngpui danchah titawp Nagaland-ah pawh kawngpui dan titawp lailawk

Committee for Koziiri-Dzuko Land Boundary Resolution leh Mao Council ṭangrualin Koziiri leh Dzuko valley-a Nagaland nena ram inchuh thubuai an neih avanga an lungawi lohna lantirna atana June 1 aṭanga Imphal leh Dimapur inkalpawhna kawngpui an danchah chu Ningani khan an titawp.

Ram inchuh thubuai kaihhnawihah Committee for Koziiri-Dzuko Land Boundary Resolution leh Mao Council chuan Naga Hoho, United Naga Council leh Naga People’s Organisation te chu ram inchuh thubuai kaihhnawihah June 3 khan meeting an neihpui a, hemi hnu hian kawngpui dan hi titawp an rel a ni.

Hetihlai hian ram inchuh avanga Nagaland lama Angami mite'n Manipur-a Naga hnam, Mao mite ei leh bara hrek tuma, kawngpui an danchahsak pawh Ningani khan an titawp lailawk.

Nagaland lamah hian Southern Angami Youth Organization (SAYO) in kawngpui danchah hi a huaihawt a, Angami Public Organization (APO)-in kawngpui dan titawp tura a ngen hnuah an titawp lailawk rih tiin, SAYO hruaitu chuan a sawi.

Koziiri leh Dzuko valley ram hi Manipur, Senapati district-a Naga hnam, Mao mite leh Nagaland lama Angami mite chuan an ram nia chhalin, an inchuh a, SAYO chuan Mao Council chu Naga buainaa Metei hnamte hnuklutah an puh a ni.

SAYO chuan kawngpui an dan chu titawp lailawk mah se Mao mite Nagaland chhuahsan vek turin an hriattir a, mipuite chu Mao mite hum lo tur leh an in luahtir lo turin an ngen. Mao mite lo hum tum an awm a nih chuan an chungah eng pawh thleng a mawh an phur loh tur thu a tarlang bawk.

SAYO thuchhuak chuan Mao mite chu Southern Angami bial lut lo turin an hriattir bawk.