Arunachal-in schemes a kalpui mekte ennawn dawn

Arunachal Pradesh chuan Chief Minister Nabam Tuki kaihhruaina hnuaia Nilainia cabinet meeting neihah North Eastern Council (NEC), Non-Lapsable Central Pool of Resources (NLCPR), Centrally Sponsored Schemes (CSS) leh state sorkar scheme kalpui mekte chu ennawn a rel.

Arunachal eptu MLA te'n CSS kalpuinaah state sorkar chu cheng vaibelchhe 900 tichingpenah an puh a, hemi chungchang hi DoNER Ministry-a an thlen hnuah DoNER Minister Jitendra Singh chuan May 25 khan Arunachal Pradesh-a NLCPR leh NEC hnuaia CSS kalpuinaa sum chingpen chu chhuichiang turin a hriattir a ni.

DoNER Ministry-in CSS kalpuinaa sum chingpen chhuichian a tum hnuah state cabinet meeting chuan scheme kalpui mekte hi ennawn a rel tih state sorkar thupuangtu, Bamang Felix chuan a sawi a, scheme kalpui mekte ennawn chu a enkawltu minister ṭheuh te'n an neih tur thu leh state sorkarah report an thehluh tur thu a sawi.

Felix chuan central fund hman dan­ah thil fel lo hmuh a nih chuan state sorkarin enliam a tum loh thu a sawi a, mahse eptu MLA 11 te'n central fund vaibelchhe 900 tichingpena an puhna chu finfiahna awm lo a ni, a ti a, hei hian rim taka hna thawk, state sorkar official te a tihnual hle, a ti.

Chief Minister Tuki pawhin a department hnuaia central schemes kalpui mekte chu a enfiah ṭan nghal a, PHE & Water Supply department leh Hydropower department official te chu Ningani khan meeting a neihpui nghal.