Manipur: AFSPA duh lohna lantirin kawng zawh

Manipur khawpui Imphal-a THAU Ground-ah nimin khan Armed Forces(Special power) Act (AFSPA) duh lohna lantirin kawng zawh huaihawt a ni a, tel an ṭhahnem hle.

Kawngzawh hi International Human Rights Day denchhena buatsaih a ni a, sipai hnena thuneihna sang pekna dan hi nuai bo leh, rorelna dik a awm phutin kawng an zawh a ni. He kawngzawh hi civil society organizations (CSOs) huaihawt a ni a, he pawlah hian All Manipur United Clubs Organisation (AMUCO), Poirei Leimarol Meira Paibi Apunba Manipur (POIREI LEIMAROL), Manipur Students Federation (MSF), Centre for Human Rights (COHR) leh All Manipur Women Voluntary Association (AMaWOVA) te an tel a ni.

Kawngzawhnaah hian zirlai leh tualchhunga hnam hrang hrangte an tel a, AFSPA chu mihring dikna chanvo rahbehsaktu, 'dan sakei' tiin an sawi. AFSPA an duh lohna thu ziakte kengin, he dan hman mek hi sut tura an phutnate pawh an aupui bawk a ni.

Kumin November khan sorkar laipui chuan AFSPA hi Manipur-a hmun ralṭi leh derthawng zual lai, police station area paruk huam chhungah a hmang leh a ni. Union Home Ministry chuan tualchhunga hnam hnih inkara buaina chhuak chhunzawm zel avangin he dan hmang tura thutlukna hi siam thar leh a nih thu a sawi a ni. Hemi hma, October 1 khan Manipur sorkar chuan heng hmun paruk telin, police station area 19 tih loh state chhung hmun dang zawngah AFSPA hi a lo hmang tawh bawk. AFSPA hman thar lehnate chu Imphal West district-a Sekmai leh Lamsang, Imphal East district-a Lamolai, Jiribam district-a Jiribam, Kangpokpi district-a Leimakhong leh Bishnupur district-a Morang te an ni.

AFSPA hi sipai hnena thuneihna sang tak pekna a ni a, warrant nei kher loin mi an dapin an hreng thei a ni. Manipur bakah hmarchhak state ṭhenkhat, 'disturbed area' a puanah hman a ni. Mahse he dan hman mekna hmun hrang hrangah tualchhung mite sawisel a hlawh hle a; society group, activist leh mipui nawlpui pawhin he dan duh lohna hi an la lantir fo ṭhin.