Nagaland tan constitution leh flag hran siam a ni lo ang : Governor

Nagaland Governor leh Naga peace talk neih meka sorkar laipui aiawhtu, RN Ravi chuan National Socialist Council of Nagaland-Isak-Muivah (NSCN-IM) ten an phut, Nagaland puala constitution leh flag hran neih chu a hnawlsak. 

Nagaland statehood day vawi 58-na puala thu a sawiah Governor chuan, "India ram mipui zawng zawng tan Indian national flag leh Constitution a awm a ni. Sorkar laipui chuan India ramah national flag leh constitution pakhat chauh a awm tur thu a tichiang hle. Hemi kalh zawnga thu lo sawite chuan thu dik tawk lo an sawi a, mipuite rilru hruai kawi an tum mai a ni," a ti. 

Hun rei tak chhung sorkar laipui leh NSCN-IM hian inremna zawngin inbiakna an kalpui tawh a, inremna tluantling erawh an la siam thei lo. Naga lam thil phut 31 zinga a tam zawk chu sawifel a ni tawh bawk. Mahse flag leh constitution hran an phut chungchangah hian an la inrem thei lo a ni. 

NSCN-IM hian Nagaland state leh a chhehvela Naga hnam chenna bial chu Naga state, Nagalim-a siam an phut. Nagalim siamna atana an phut hian an ṭhenawm state, Manipur, Arunachal Pradesh leh Assam-a Naga hnam chenna bialte pawh a huam tel a, hei hi an ṭhenawm state-te hian an pawm loh thu pawh an lo sawi tawh a ni.