India leh Bangladesh-in a takin LBA kalpui tan
India leh Bangladesh-in ram inchuh thubuai chinfelna atana thuthlung an ziah, kum 40-a upa, Land Boundary Agreement chu kar kalta Inrinni khan ram pahnih Prime Minister te'n hming ziah hnana an pawm hnuah a taka kalpui ṭan a ni.
Prime Minister Narendra Modi hian ni hnih cham turin Inrinni khan Bangladesh a tlawh a, Bangladesh Prime Minister Sheikh Hasina nen inkawmin, ram pahnihte thawhdunna tur thuthlung eng emaw zat an ziak tel bawk.
LBA hi India leh Bangladesh ram inchuh thubuai chinfelna tur niin, thuthlung an siam angin India leh Bangladesh chuan ram an inluahsakte an inthleng ang.
Bangladesh mite'n India ram an luah, hmun 111, acre 17,160.63-a zau chu Bangladesh-in a nei hlen ang a, India mite'n Bangladesh ram an luah, hmun 51, acre 7,110.02-a zau chu India-in a nei hlen ang.
LBA hi kum 1974, May 16 khan India Prime Minister Indira Gandhi leh Bangladesh Prime Minister Sheikh Mujibur Rahman ten an ziak a, kum 2011 khan Prime Minister Manmohan Singh leh Bangladesh Prime Minister Sheikh Hasina chuan LBA 1974 hnuaiah thuthlung an ziahbelh leh a ni.
LBA a taka kalpuina atan hian Prime Minister Modi kaihhruai, NDA sorkar kumin May 6 leh 7 khan Rajya Sabha leh Lok Sabha-ah a pass a, kar kalta Inrinnia Modi leh Hasina-in LBA hnuaia thuthlungte chu an pawmpui hnuah, a taka hman ṭan nghal a ni dawn ta a ni.
LBA hnuaiah hian India ram Bangladesh-in a neih hlen turte hi Assam, Meghalaya, Tripura leh West Bengal ramte a ni. Ram pahnihte ram inthleng turah hian hian India leh Bangladesh mi 51,000 vel an cheng. LBA ziahfel tak ang chuan heng mite hian khua leh tui nihnaah India emaw Bangladesh, an duhzawk an thlang thei ang.
Inrinni vek khan Prime Minister Modi leh Bangladesh PM Hasina chuan Bangladesh khawpui, Dhaka kaltlanga, Kolkata leh Agartala inkara bus service leh Dhaka-Shillong-Guwahati inkara bus service an vai liam bawk. Modi hi West Bengal Chief Minister Mamta Banerjee-in a ṭawiawm.
Thingpui huan neitute'n
LBA an dodal
India leh Bangladesh ramri thubuai chinfel-na tur, Land Boundary Agreement (LBA) chu Assam-a thingpui huan neitute'n an dodal.
Madanpore Tea Estate excutive director Jose Mukhathu chuan Karimganj district-a thingpui huan acre 74.54 chu Bangaladesh hnenah pek tel a ni dawn tih a sawi a, LBA chungchanga sorkar laipui thutlukna chuan a tihlawm loh thu a sawi.
Mukhathu chuan LBA avanga Bangladesh hnena thingpui huan acre 74.54 pek tel a nih dawn vang hian Madanpore Tea Estate chuan kumtin cheng vaibelchhe 10 a hloh theih tur thu a sawi.
Putni Tea Estate pawhin Bangladesh hnena ram pek turah hian chhiah an chawi ṭhin thu leh Bangladesh-in a nei tur hriatthiam harsa an tih thu an tarlang.
LBA hi Assam-a zirlai pawl, All Assam Students Union (AASU) chuan Bangladesh laka an ram hlohna tura ngaiin, an dodal tawh bawk.