UNTABA-in SC-ah PIL thehluh tum

Assam leh Nagaland ram inchuh thubuaiah United Naga Tribes Asso­ciation of Border Areas (UNTABA) chuan Supreme Court-ah Public-Interest Litigation (PIL) thehluh a tum.

UNTABA Chairman Hukavi T Yeputhomi chuan thuchhuah a siamah, British rorelna hnuaiah Naga Hills District chu kum 1866-a din a ni tih a tarlang a, Naga Hills District ramri chu kum 1867-a siam a nih thu leh kum 1875-ah siamṭhat a nih thu a tarlang bawk. Naga Hills District leh Naga Hills Tuensang ramri chungchanga kum 1952-a sorkar notification chu zirchianna awm hmasa loa buatsaih a ni a, kum 1867-a ramri siamfel tawh nen a inang lo a ni, a ti.

UNTABA thuchhuak chuan Nagaland state siam a nihna, India danpuia 13th amendment emaw chu State of Nagaland Act 1962 khin an tum thu an tarlang bawk a, Nagaland state chu 1867 notification tlawhchhana siam a nih loh thu leh 1952 notification tlawhchhana siam a nih thu a tarlang.

Prime Minister Jawaharlal Nehru hun laia buatsaih, India leh Myanmar ramri, Inter­national MacMohan Line chu Naga mipuite duhdan ni loin siam a nih thu leh Naga mipuite ṭhenhrangtu a ni tih UNTABA chuan a tarlang bawk a, hei pawh hi Supreme Court-ah hian khin an tum thu a tarlang.

Assam leh Nagaland ram inchuh thubuai chungchangah hian Assam sorkar pawhin Supreme Court-ah thubuai a thehlut a, Assam leh Nagaland ramri chu kum 1925 noti­fication tlawhchhana siam an phut a ni a, UNTABA chuan 1925 notification tlawhchhana ramri kham a nih chuan Nagaland-in Assam lakah a ram square miles 5,000-a zau a hloh dawn a ni, a ti.