Officer te'n helte beihna tur fund an tichingpen: Sharmila

Armed Forces Special Powers Act (AFSPA ) hlih phuta kum 14 chuang chaw ngheia nuar tawh, human rights activist Irom Sharmila chuan hmar­chhak state-a sorkar officer te chu hel beihna tura sorkar laipuiin fund a pekte tichengpenah a puh.

Sharmila hian chaw ngheia nawrh a huaihawt avanga Delhi court-in mahnia intihhlum tum thubuai a siamsak chungchangah kar kalta Inrinni khan Patiala House court-ah a inlan a, hemi hnu hian thuthar thehdarhtute hmaah he thu hi a sawi.

Manipur sorkarin mahni intihhlum tuma a puhna thubuaiah Imphal East district court chuan kumin January 23 khan thiam a chantira, chaw nghei a chhunzawm zel avangin January 24 khan man leh nghal a ni a, judicial custody-ah dah a ni.

"Manipur leh hmarchhak state danga sorkar officer lian leh thuneitute chuan sorkar laipuiin helte beihna atana fund a pekte chu anmahni mimal hlawkna atan an hmang ṭhin a ni," a ti.

Kar kalta Ningania sipai 18 thihna thlentu, Army convoy lambun chung­chang chu Sharmila chuan sawiin, sorkarin tharum thawhna hmanga helte a beilet ṭhin chu helna tihluartu a ni, a ti a, tharum thawhna chuan eng harsatna mah a chingfel lo ang, a ti.

"Râwng taka helte chetna chu dem tur a ni a, mahse hetiang thilthleng hi AFSPA hlih a nih chauhin a reh thei ang," tiin a sawi.

Sharmila chuan sipaite hnena thuneih­na sang pek chu tharum thawhna tihluartu a ni, tiin a sawi bawk a, remna awm theihna atan sorkar laipuiin Manipur leh hmun danga sipai a dahte a lakchhuah a ngai a ni, a ti.