UNESCO-in Assam journalist thih dan chhui phut

UNESCO director-general Audrey Azoulay chuan India ram thuneitute hnenah Assam journalist Paraq Bhuyan thih dan chu rang taka chhui chiang turin a ngen. 

Parar Bhuyan hi November 11 khan Kakopthar-ah car-in a su a, hliam na tak tuarin damdawi-ina enkawl a nih hnuah a thi a ni. A sutu car hi a tlanbo nghal a ni. Azoulay chuan UNESCO website-ah thuchhuah siamin, Paraq Bhuyan chunga thil thleng chu a dem hle tih a sawi a, journalist-ten an hna an thawhna kawngah him taka an awm theihna tura theihtawp chhuah a ngai tih sawiin, Bhuyan thih dan chu rang taka an chhui chhuah ngei a beisei thu a sawi a ni. 

Editors’ Guild of India pawhin Assam chief minister Sarbananda Sonowal hnenah lehkha thawnin, Assam-a journalist-te kut thlakna thleng fo chu ngaihmawhawm leh, thuneitute pawhin an ngaihven a ngaih thu an lo sawi tawh bawk. Kum 1991 aṭang khan Assam-ah hian journalist 31 thah an ni tawh. 

CM Sonowal chuan Bhu­yan thih dan hi chhui chiang turin criminal investiga­tion department (CID) a hriattir tawh a, motor khalhtu leh a thurualpui nia sawi chu Aru­nachal Pradesh-a Namsai hmunah man an ni tawh a ni.