Army lambun NIA-in a chhuichiang dawn

Kar kalta Ningania Manipur, Chandel district-a helte'n army convoy an lambun chu National Investigation Agency-in a chhuichiang dawn.

Army convoy lambunah hian 6 Dogra regiment sipai 18 an thih bakah 11-in hliam an tuar a, Khaplang-a kaihhruai, National Socialist Council of Nagaland (NSCN-K), Kanglei Yawol Kanna Lup (KYKL) leh Kangleipak Communist Party (KCP) hel ṭangrualte chu pawikhawihtua rin an ni. Sipai 18 thi bakah helpawl lamah NSCN (K) hel nia rin, pakhat a thi bawk.

Union Home Minister Rajnath Singh chuan thilthleng avangin Ningani khan high level meeting a ko nghal a, helte beihlet dan tur an rel bakah pawikhawihtute chu hrem loha an chhuah loh tur thu leh an chungah a na thei ang bera action lak an tum thu a sawi.

Sorkar laipui chuan 6 Dogra regiment te chunga thilthleng hi a ngai thu tak hle a, security force te chu helte lakah beihpui thlak nghal tura a hriattir bakah inralring renga awm turin a hriattir.

March 27-a sorkar laipui nena inkahhai thuthlung an ziah titawptu, NSCN-K chuan army convoy lambuntute an nih thu an puang tawh a, April 2-a Arunachal, Tirap district-a sorkar sipai pathum thihna thlentu, army convoy lambun pawh an thiltih tiin an lo chhal tawh bawk.

NSCN-K, ULFA (I), Kamatapur Liberation Organisation leh Songbijit-a kaiihruai, NDFB hel ṭangrual pawl, United Liberation Front of Western South East Asia te chuan May 3 khan Nagaland, Mon district-ah Assam Rifles tui chawi motor an lambun tawh bawk a, hemi ṭum hian Assam Rifles pasarih an thi.

Hetihlai hian Army Chief Gen Dalbir Singh Suhag chuan kar kalta Zirtawpni khan army lambunna hmun, Chandel district a tlawh nghal a, Manipur-a Army hotute chu helte laka beihpui thlak dan tur a sawipui nghal.

Kar kalta Inrinni khan Imphal International airport-ah Dogra regiment sipai 18 thite thlahna hi hman a ni a, Manipur Governor Syed Ahmed, Chief Minister Ibobi Singh, Deputy Chief Minister Gaikhangam, GOC 3 Corps Lt Gen Bipin Rawat, GOC of 57 Mountain Division Maj. Gen Nageshwor Rao leh IGAR (S) Maj. Gen. Srinivash te an tel. Sipai thite zahna leh chawimawina hun hman a nih hnuah an chenna state-ah ṭheuh thlawh haw pui nghal an ni.