Manipur CM-in state dinhmun thlirpui

Manipur chief minister N Biren Singh chuan Covid-19 hri a kai enkawl dam a nih hnuah Thawhlehni khan Chief Minister Secretariat tualah meeting koin, state chhunga hri leng dinhmunte an sawiho. 

N Biren Singh hi November 15 khan Covid-19 a kai tih hriat a ni a, in lamah enkawl a nih hnuin Thawhṭanni khan RT-PCR test neihpui aṭangin hri hi a kai tawh lo tih hriat a ni. 

Thawhlehnia meeting a neihah hian cabinet minister tam zawk an tel a, state health service official-te chuan hri leng dinhmun te, sorkarin hri darh zel tur venna atana hma a lak dante an sawifiah. CM chuan Covid-19 vanga thi an pun belh zel lohna tura hri kaite rang taka hriatchhuah an ni a, enkawl thuai an nih a ṭul thu a sawi ve bawk. 

CM chuan official-te hnen­ah district hrang hrangah oxygen an neih dante vil ṭha turin a chah a, sorkar leh private hospital hrang hrangten hri dona kawnga thawhhona ṭha tak an neih theihna turin heng hmuna medical superintendent-te puala WhatsApp group siam turin official-te chu a hrilh bawk a ni. Damdawi-in hrang hranga Covid-19 kaite enkawl an nih dante pawh enfiah reng turin a ti.