Assam: Hmelma laka him nan Israel kalphung entawn a ṭul: CM

Assam chief minister Himanta Biswa Sarma chuan Assam culture leh identity venghim turin Israel ram kalphung leh an chet dan entawn a, an inzir a ṭul a thu a sawi.

Chief Minister hian Thawhlehnia Jamugurihat, Sonitpur district a 'Swahid Diwas' programme-a thu a sawiah he thu hi a sawi chhuak a ni. Assam ramri dinhmun leh mihring pung chho zelin harsatna a thlen dan chungchangte a sawi a ni.

Sarma chuan Assam ramri chu a him loh thu a sawi a; Bangladesh, Myanmar leh West Bengal te nen ramri inhnaih taka awm an nih thu sawiin district 12-ah hian Assamese chu a hnam tlem zawk an nih tawh thu a sawi. Hetiang a nih avang hian Israel te thiamna, science leh technology te chu huaisenna nen hmelma ten min beih hun a thleng anih pawhin kan hmang ve tur a ni tiin, chumi hunah chuan a hnam angin kan dam khawchhuak thei ang, a ti.

'Swahid Diwas' hi Khargeswar Talukdar, Assam in kumruk lai buaina a tawh ṭuma ram tana nun hlantu martar hmasa ber hriatrengna hun a ni. August 1,1985 a Assam Accord ziah a nih khan buaina hi a reh ve thei chauh a ni.

He programme, Bharatiya Janata Yuba Morcha buatsaihah hian Sarma chuan Accord ziahna pawh kum 40 liam tawh mahse rampawn aṭangin vauna anla tawh reng thu a sawi. Mipuite chu ramdang mite kuta an tlukluh loh nan intodelh a pawimawh thu a hrilh bawk.

Sarma chuan pawn lam aṭanga vauna a awm reng thu leh nitin khaw mi leh saten an ram an chan thu sawiin, ram hmangaihna hi hriatthiamna leh sorkarnaah a tawp mai lo a, mipui venghim tur chuan hmelmate chu huaisenna nen beih an ngaih thu a sawi. Assam Agitation chu dan phalloha ramchhunga pemlut hnawhchhuahna hmanrua a ni a, mahni intodelhna kawnga hmasawnna lamah ṭhalaite pawhin mawhphurhna sang tak an nei a ni, a ti. Insak hna thawh, rickshaw khalh leh bus khalh thleng pawhin state pawn miten an thawk a, ecocomy an khawihchhiat thu a sawi bawk .

CM chuan an state chu district tina medical college leh university nei awmchhun an nih dawn bakah Brahmaputra lui luan tlangna district ah lei pakhat tal dawh zel a nih tur thu a sawi bawk a ni.