Meghalaya: CM-in Science block leh classroom thar hawng

Meghalaya chief minister Conrad K Sangma chuan December 10 khan South West Khasi Hills district-a Mawkyrwat khuaa Sngap Syiem College-ah Science block leh classroom thar a hawng.

Heng hmun hi RUSA 2.0 Infrastructure in college tana fund a pek hmanga sak an ni.

Hawnna inkhawmah hian CM Sangma chuan education sectorin kum ruk kalta aṭanga hmasawnna hrang hrang a neihte a sawilang a, infrastructure tih hmasawn, thawktu zat tih pun leh thildang pawimawh tak tak siam chu sorkar inpekna leh ngaih pawimawh ber a nih thu a sawi.

Hei bakah hian December 9 khan Cabinet chuan sorkar college pangaah science leh commerce stream dah tharna tur a pawm thu sawiin, National Education Policy (NEP) zulzuiin zirlaite mamawh hrang hrang bakah hamṭhatna dangte siamsak a ni tih a sawi bawk.

CM Sangma chuan Sngap Syiem College chu Science stream ah People's College list zingah dah tel a nih tur thu a sawi. Hei bakah hian Chief Minister's Special Rural Development Fund (CMSDF) kaltlangin school bus leina tur leh, multipurpose hall sakna tur Rs nuai 20 a ruahman sak bawk a ni.