Manipur: Manipur Police-ten opium chinna hmun acre 59 ti chhia

Manipur police-te chuan Ukhrul leh Kangpokpi district-a opium chinna hmun acre 59-a zau an tichhia tih chief minister N. Biren Singh chuan a official social media X ah a tarlang.

Manipur police, forest department, Border Security Force (BSF) leh district thuneitute thawk ho chuan thu an dawn bawhzuiin dan phal loha opium chinna hmun dap chhuah hna hi an thawk a ni. Ukhrul-a Mapithel tlangdung, Phungyar ah opium chinna hmun acre 45 an tihchhiat bakah mi pahnih an man tel bawk..

An mi mante hi Letkhohao Haokip (37) leh Hegou Khongsai (30), Ukhrul ami te an ni.

Hmun danga opium chinna hmun zawn beihpui an thlakna, Kangpokpi district-a Thonglang Akupta bul hnaiah pawh opium chinna hmun acre 14 an tichhe bawk.

Chief minister N.Biren Singh chuan security force te hmalakna leh thawhrimna chu a fak hle a, a official social media X ah thuchhuahin Kangpokpi district police leh 90 CRPF ṭangkawp, Additional SP (L/O) kaihhruaina leh SP Kangpokpi hona hnuaiah Thonglang Akutpa bul hnaia opium chinna hmun acre 14 a zau tihchhiat a ni chu lawmawm atih thu a sawi. Central Reserve Police Force (CRPF) ten theihtawp an chhuahpui naah lawmthu a hrilh bawk.

Chief Minister chuan heng hmalakna hi state leh sorkar laipuiin ruihhlo darh zel tur tih rehna leh ruihhlo dona campaign a neih mek hnuaia kalpui a nih thu a sawi.