PM Modi lakah Assam leh Tripura lungawi lo
Prime Minister Narendra Modi-a'n kar kalta Inrinnia Bangladesh a tlawh ṭuma hmarchhak state Chief Minister tumah a hruai tel loh chungchangah Assam leh Tripura sorkar chuan an lungawi loh thu an tarlang.
Prime Minister Modi hian Bangladesh Prime Minister Sheikh Hasina nen ram inchuh thubuai chinfelna tur, Land Boundary Agreement (LBA) kalpuina atana thil tihfel ngaite chingfelin, LBA hi a taka kalpui nghal a ni a, LBA-ah hian Assam, Meghalaya leh Tripura ramte chu Bangladesh hnena pekna tur thuthlung a tel.
Assam Chief Minister Tarun Gogoi chuan Modi-a'n hmarchhak Chief Minister te Bangladesh-a a hruai loh vanga a lungawi loh thu sawiin, "Hmarchhak Chief Minister te a hruai tel lo hi Modi-a'n a sawi uar tak, central leh state sorkar thawhhona ṭha, cooperative federalism kalphung kalh a ni. Modi-a thiltih dan hian Bangladesh leh India thawhhona ṭha siam kawngah hmarchhak state te chu pawimawhna leh mawhphurhna nei lo angin a lantir a ni," a ti.
Bangladesh-ah hian Prime Minister Modi leh Bangladesh PM Hasina chuan Kolkata-Dhaka-Agartala inkar leh Dhaka-Shillong-Guwahati inkara bus service an vai liam nghal a, Modi hi West Bengal Chief Minister Mamata Banerjee-in a ṭawiawm. Hetihlai hian hmarchhak state-a bus service-na tur state Chief Minister te erawh an tel ve lo.
Tripura Transport Minister Manik Dey chuan bus service chu hmarchhak state pathum - Tripura, Meghalaya leh Assam tan a nih laiin bus service hawnnaah hian state sorkar aiawhte chu sawm an nih loh thu a sawi a, hei hian hmarchhak state te a tilungawi lo a ni, a ti.
Dey chuan central-a Modi kaihhruai BJP sorkar chu sawisel ngalin, BJP politics huang zim zia tilangtu a ni, a ti a, Tripura leh Assam chuan bus service hi UPA sorkar lai aṭanga an lo dil tawh thu leh nghakhlel taka an lo thlir, bus service ṭanna huna sawm an ni lo chu mak a tih thu a sawi.
Tripura Transport Minister chuan Agartala leh Akhaura, Bangladesh inkara rel service tur pawh a pawimawh viau laiin Modi chuan Bangladesh-ah hian a bawhzui lo a ni, a ti.