NIA-in NSCN(K) lakah Army lambun thubuai a siam

National Investigation Agency (NIA) chuan kar kalta Ningania Manipur, Chandel district-ah sipai 18 thihna thlentu, Army convoy lambun thubuaiah Pathianni khan Khaplang-a kaihhruai, Nationalist Socialist Council of Nagaland (NSCN-K) helpawl lakah thubuai a ziaklut.

NIA chuan Unlawful Activities (Prevention) Act, Explosive Sub­stan­ces Act, Arms Act leh Indian Penal Code (IPC) section ṭhenkhat tlawhchhanin thubuai a siam a ni.

"India ram laka indo chawhchhuah tumin NSCN(K) leh a thawhpui helpawlte chuan buaina an thlen a ni," tiin NIA official chuan a sawi.

Hetihlai hian Army te chuan Manipur-a ven­himna kalpui danah thil fel lo leh venhim chak lohna laite an chhui mek bawk. Kar kalta Ningania Manipur-a NSCN (K) te'n 6 Dogra Regiment te an lambun hnu khan Assam Rifles te chuan Myanmar ramri, kilometre 1,643-a thui chu an khar nghal a, mahse NSCN(K) te hian Myanmar an lut hman tho a, ni thum chhungin Arunachal Pradesh, Tirap district-a Assam Rifle camp an kap leh hman bawk.

Sorkar laipui official chuan Assam Rifle te chu ramri kana pawikhawihna thleng danchah kawngah kum eng emaw zat chu rintlak lohin an awm tawh thu a sawi a, NSCN (K), United National Liberation Front,People’s Liberation Army of Manipur leh People’s Revolutionary Party of Kangleipak helte chu Myanmar-a inkhuar vek an ni, a ti.

Assam Rifle te hi India-Myanmar veng­himtua dah an ni a, De­fence Ministry chuan nikum khan Pakistan leh Bangladesh ramri vengtu, Border Security Force (BSF) te kuta dah a remti tawh a ni.

NSCN (K) thuchhuak chuan kar kalta Ningania sipai an lambun chu Naga mite'n khawi hmunah pawh, eng hunah pawh tupawh an bei thei tih sorkar laipui an hriattirna a ni, a ti.

Naga helpawlte chuan India leh Myanmar-in Naga mipuite pawm loh ramri hmanga indaidanna an siam chu dodal zel an tum thu an tarlang bawk.