UNMM-in Army operation area-ah media luh a dil
United NGOs Mission–Manipur (UNMM) chuan Indian Army te chu hmarchhak biala an operation area-ah media luh phalsak turin an dil.
UNMM chuan tualchhung media te chu Indian Army te'n an operation area-ah luh an phalsak loh thu tarlangin, sipaite'n helpawlte laka beihpui an thlaknaah hmeichhe security force te teltir an ngen bawk.
UNMM secretary U. Nobokishore chuan security force te'n pawi an khawih a hlauhthawn thu sawiin, beihpui an thlaknaah pawisawilote chungah nunrawng takin an che thei a ni, a ti a, hetiang thil thleng a awmin state sorkar leh sorkar laipui chu 'ha aiah ha', 'mit aiah mit' kalphung hmanga chhanglet lo tur leh democracy rorelna hnuaia mipuite dikna chanvo rahbehsak lo turin a ngen bawk.
Human rights activist Irom Sharmila-in Armed Forces (Special Powers) Act, 1958 chu Manipur-a tharum thawhna thlen chhan nia a sawi chu UNMM chuan an pawmpui thu tarlangin, AFSPA chu boruak muanawm thlentirtu aia tharum thawhna chawkchhuaktu a nih zawk thu an tarlang.
UNMM chuan national media te'n Manipur, Chandel district-a Army convoy lambun chanchin nasa taka an cover chu lawmawm an tih thu tarlangin, national media mite chu thil thlenna hmun Manipur-ah kala, AFSPA hnuaia mipuite dinhmun hriatpui tura an duh thu thu an tarlang bawk.
UNMM chuan Manipur-a thil thleng chungchangah thuneitute chu remna tluantling a awm theihna atan hma la tura an duh thu an tarlang bawk.
"Hmarchhak bial mipuite chuan sorkar laipuiin remna zawnga inbiakna a kalpui danah rinna an nghat zo tawh lo a, NSCN (IM) leh sorkar laipuiin remna zawnga inbiakna an kalpui mek pawhin beisei a pha lo a, he thil ngaihthah nghawng chu NSCN (K) te'n June 4-a sipai 18 an kahhlum ang kha a ni," tiin UNMM thuchhuak chuan a tarlang bawk.