Pvt bank te lakah M'laya sorkar lungawi lo

Private bank te loan pek­chhuah aṭanga ṭhalaite tana hna siamsakna tur, project 49 kalpui a tum kaihhnawiha programme a buatsaihah Meghalaya sorkar chuan pri­vate bank te an tel loh avanga a lungawi loh thu a tarlang.

Community and Rural Development principal se­cretary KN Kumar chuan sorkarin ṭhalai hna nei lote hna siamsak tuma hma a laknaah private bank te an tel duh lo chu mak a tih thu a sawi.

Ahmedabad-a Entrepre­neurship Development Insti­tute of India (EDI) chuan State Institute of Rural De­vel­opment (SIRD) atan tun­hnai khan state chhunga sum­dawnna kawng inhawn dan zirchianna a buatsaih a, EDI report tlangzarhnaah Kumar chuan he thu hi a sawi.

"Bank te chu sorkar ṭan­puina mamawhtu an ni a, an thil duh puitlin nan sorkar kawng kharah an intlar reng ṭhin a ni," a ti.

Sorkar programme buat­saihah hian private bank aṭang­in HDFC bank chauh an tel a, hetihlai hian sorkar bank te chu an tel vek thung.

State Rural Development principal secretary Kumar chuan Meghalaya-ah ṭhalai kum 15 leh 29 inkar mi nuai 7.5 an awm thu a tarlang a, heng zinga a tam zawk hian hna an zawng mek a, hei vang hian SIRD chuan heng ṭha­laite hi thiamthil (skill) nei tir tumin kum 2013 khan EDI chu memorandum of under­standing (MoU) a ziahpui a ni, a ti.

Kum 2013 aṭangin ṭhalai hna nei lo ṭhahnem tak chu EDI hnuaiah training neiin, mahnia sumdawnna kalpui dan tur an zir a ni, tiin Kumar chuan a sawi a, kum 2014-15 khan mi 407 chu EDI aṭang­in an zirchhuak a ni, a ti. Meghalaya sorkar chuan EDI hnuaiah hian kuminah training programme 51 kalpui a tum.

Kumar chuan Megha­laya-a bank te credit deposit (CD) ratio chu 23.4% chauh a nih thu sawiin, Gujarat-ah chuan 78.1% a ni, a ti a, hei vang hian bank te chu loan pechhuak tam turin a ngen nghal.