Army convoy lambun: Police te'n ruang pakhat an hlawm

Manipur police team chuan June 4-a Chandel district-a 6th Dogra regiment te lambunnaa mi pakhat thi tel ve ruang chu Thawhṭanni khan an hlawm a, mitthi hi sipaitu lambuntu, hel nia rin a ni.

Police te hian security force te hnen aṭanga an thudawn bawh­zuiin mitthi ruang hi an hlawm a, ruang hi sipaite lambunna bul, ramngaw-ah hmuh niin, a taksaah silai mu luhna hnu hmuh a ni.

Police te chuan ramngaw-ah hian sipaitu lambuntu zinga mi pathum ruang hmuh an nih thu an dawng a, mahse a hmun an thlenin mi pakhat ruang chauh an hmu thung.

Mitthi ruang hi JNIMS dam­dawi-in Imphal-ah endik tura dah nghal a ni.

Police official chuan helte lakah security force te'n beihpui an thlak nghal thu a sawi a, hemi karah hian police te chuan mitthi ruang hi an hlawm a ni, a ti.

National Investigation Agency (NIA) te pawhin sipai lambunna hmun hi Pathianni khan an enfiah tawh a, bomb puak lo an hmuh bakah NSCN (K) hotu pakhat ruang an chharna bulah sana bun chi pakhat an chhar bawk.

Hetihlai hian Chandel dis­trict, Tonsen Khullen khua aṭanga June 4-a sangha man tura chhuak, mi pali - K Rajamani Kom, Y Mandana Kom, Yumnam Koireng leh Koko Kom te chu an chin hriat lohin an la awm a, police te pawhin an chin an la hriat loh thu an sawi. Hemi chung­changah hian Sugnu police station-ah thubuai ziahluh a ni.

Sangha mantu chhungte chuan June 4-a sipai lambun avanga security force te beihpui thlaknaa an thih an hlauhthawn thu a sawi a, khawtlang hruaitute chuan chin hriat loha awmte hi an hmu a nih chuan kut thlak lo turin security force te an ngen.