Khasi ṭawng 8th Schedule a telh tum Committee-in state sorkarah report thehlut dawn

Meghalaya sorkar chuan Khasi ṭawng chu India danpui, 8th Schedule-a telh tumin, ṭhil ṭul te bawhzui turin member panga awmna committee a din a, committee chuan report thehluh thuai a tum.

Committee member Sylvanus Lamare chuan report chu peihfel tawh thu sawiin, kar leh hian state sorkarah thehluh an tum thu a sawi.

Committee member te hi St Edmund’s Col­lege principal Sylvanus Lamare bakah, Megha­laya Board of School Education (MBoSE) Executive Chairman, EP Kharbhih leh S Quotient Sumer te an ni a, Art and Culture Director hlui Matsiewdor War chu committee con­venor-a dah a ni bawk.

Committee report hi state sorkar chuan a zir­chian hnuah 8th Schedule-a Khasi ṭawng telh turin sorkar laipui ngen a tum.

Meghalaya sorkar chuan kum 2005 khan Khasi leh Garo chu state Associate Official Languages-ah a puang tawh a ni.

Lamare chuan Khasi ṭawng chu 8th Schedule-a telh a nih chuan Khasi ṭawng a hausak tur thu a sawi a, Khasi ṭawng chu University-a syllabus-ah te telh theih a ni dawn a ni, a ti.

8th Schedule-ah hian ṭawng 22 a awm a, chungte chu (1) Assamese, (2) Bengali, (3) Gujarati, (4) Hindi, (5) Kannada, (6) Kashmiri,(7) Konkani, (8) Malayalam, (9) Manipuri, (10) Marathi, (11) Nepali, (12) Oriya, (13) Punjabi, (14) Sanskrit, (15) Sindhi, (16) Tamil, (17) Telugu, (18) Urdu (19) Bodo, (20) Santhali, (21) Maithili leh (22) Dogri te an ni.

Sorkar laipuiin a tirah ṭawng 14 chu 8th Schedule-ah hian a telh a, kum 1967 khan Sindhi ṭawng chu a telh leh a, kum 1992-ah ṭawng thum - Konkani, Manipuri leh Nepali te dah belh lehin, kum 2004 khan Bodo, Dogri, Maithili leh Santhali ṭawngte chu a telh leh a ni.