Zeliang-a'n sorkar deptt te revenue lalut tam turin ngen

Nagaland Chief Mi­nister T R Zeliang chuan revenue latu, sorkar depart­ment zawng zawngte chu chak zawka hma laa, revenue an lakluhte tipung turin a ngen.

Directorate of Mu­nicipal Affairs hawnnaah Zeliang chuan he thu hi sawichhuakin, Naga mipuite'n anmahnia sum thawhchhuah dan an zir a hun tawh thu leh midangte ṭanpui thei tur khawpa sum thawhchhuah a pawimawh thu a sawi.

Zeliang chuan Mu­nicipal leh Town council te pawh revenue hailuttu an nih thu sawiin, official leh staff te chu revenue tihpun nan kawng thar dap turin a ngen bawk.

"Dimapur Municipal Council (DMC) chuan a hmain, Toll Tax chu mimal a khawn tir ṭhin a, cheng nuai 20 aṭanga 25 thleng an khawn khawm ṭhin. Mahse tunah chuan anmahniin an khawn tawh a, revenue aṭanga an sum lakluh chu nuai 80-ah a pung tawh a ni. Revenue tihpun nan he kalphung hi hmang ve turin Nagaland-a Mu­nicipal Council pathum leh Town committee 16 te pawh ka ngen a ni," a ti.

74th Constitutional Amendment Act chuan local body te chu thuam chakin thuneihna leh mawhphurhna tam zawk a pe a, hei vang hian Nagaland sorkar pawh­in Department of Municipal Affairs chu amaha municipal rules in­siamchawp turin thu­neihna a pe a ni, tiin Zeliang chuan a sawi bawk a, hmeichhiate 33% seat hausak kawnga court-a thubuai kal lai a awm avangin muncipal council inthlanna chu kum eng emaw zat neih a nih tawh loh thu a sawi bawk.