KNP ram chungchangah report thehlut turin Assam hriattir dawn

Union Environment and Forest Minister Prakash Javadekar chuan mi ṭhenkhatin phalna nei loa Kaziranga National Park (KNP) ram an luah chungchangah Assam sorkar chu report thehlut tura hriattir a tum thu a sawi.

Javadekar chuan tunhnaia KNP a tlawh laiin tualchhung mite pawh a kawm thu sawiin, phalna nei loa KNP ram luah chungchang erawh an sawi lan loh thu a sawi a, mahse hemi chungchang hi thuthang a awm avangin Union Ministry of Environment and Forest chuan Assam sorkar chu report thehlut turin hriattir a tum a ni, a ti. Union Minister chuan a ṭul a nih chuan KNP tlawh leh pawh a hreh loh thu a sawi bawk.

"Mimalin forest area an luah chung­chang bawhzui chu state sorkar mawh­phurhna a ni a, mahse team angin kan thawk­ho a ni," tiin Javadekar chuan a sawi.

Rhino Protection Force atan Assam sorkarin hna a lak ṭan tawh thu Union Minister chuan a sawi bawk a, sapel ru ṭhinte dan nan leh samakte humhalh nan theihtawp an chhuah thu a sawi bawk.

India rama samak awm 2,669 aṭangin 2,401 chu KNP-a awm a nih thu a tarlang a, sakei awm zat chu 2,226 a nih thu leh sakeibaknei pawh 523-ah a pun tawh thu a tarlang bawk.

"Sorkar laipui chuan Tiger Pro­tection Forces pali leh Rhino Protection Force pakhat a din thawh a, kum khat ralta chhung khan sa pel ru ṭhin 30 kahhlum an ni," a ti.