Assam tuilian: Kumina tuilian thleng hmasa ber mi 60,000 velin tuar

Ruahsur nasa avanga kumina Assam-a tuilian thleng hmasa ber chu district pakuaa mi 60,000 velin tunhnai khan an tuar nghal.

Assam State Disaster Management Authority chuan Thawhṭannia thuchhuah a siamah Brahmaputra leh Jia Bharali luite chu Jorhat leh Sonitpur district-ah hlauhawm chhinchhiahna pelin an lian a ni.

State sorkar chuan tun hnaia tuilian hi Bar­peta, Sonitpur, Dhemaji, Bongaigaon, Lakhimpur, Tinsukia, Darrang, Nal­bari leh Goalpara district-ah mi 64,934-in an tawrh thu a tarlang a, Assam hmar lama, Lakhimpur district chu a tuar na ber niin, mi 25,000 velin an tawrh bakah tuilianah mi pakhat a thi tawh bawk.

Tui lian hian leilet hec­tare 330.91-a zaua thlai chin a tichhiat bakah Nalbari district-a tui lian danna bang hmun hnihah a tichhe bawk a, Sonitpur district, Charduar hmun­ah kawngpui a tichhe bawk a ni.

State revenue depart­ment chuan tuilian tuar­te chhawmdawlna atan relief camp hawn a tum thu leh bungraw mamawhte pek a tum thu a tarlang a, tui lian tuar zel thei an la nih avangin chhawmdawl hna thawh nan a lo inbuatsaih lawk thu a tarlang bawk.