IIT-G convocation National curriculum-ah NE subject telh dawn: HRD Minister Irani

Union Human Resource Development Minister Smriti Zubin Irani chuan Thawhṭanni khan Indian Institute of Technology (IIT) Guwahati convocation vawi 17-na a hmanpui a, national curriculum-a hmarchhak subject- history, culture, geography leh hmarchhak chanchin dangte telh dan turah mipui ngaihdan lak nan sorkar laipuiin sawihona hun, national conference buatsaih a tum thu a sawi.

HRD Minister chuan convocation thuchah a sawiah IIT Guwahati leh IIT Kharagpur ṭangrualin, school-a zirtirtu 10,000 chu science leh mathematics-ah training an pek tur a sawi.

Prime Minister Narendra Modi-a kaihhruai NDA sorkarin hmarchhak bial hmasawnna a ngaih­pawimawh thu sawiin, HRD Ministry hnuaia 'Ishan Vikas' scholarship scheme pawh hmarchhak bial ngaihpawimawh vanga kalpui a ni, a ti.

IIT Guwahati-a zirtirtu, research thehlarna atana course buatsaih thei hnenah Irani chuan cheng nuai khat lawmman pek a nih tur thu a puang bawk. He lawmman hi education hmasawnna atana zirtirtute inpe tak takte tihphurna leh chawimawina a ni, a ti.

IIT Guwahati convocation-ah hian mi 124-in Ph.D degree an dawng a, undergraduate zirlai 578 leh post-graduate zirlai 415-in degree an dawng bawk.

IIT Guwahati Director Prof Gautam Biswas chuan report pein, IIT Guwahati hmasawnna hrang hrang a tarlang a, Ph.D tilai chu nikuma 1,310 aṭangin kuminah 1,531-ah an pun thu a tarlang.

IIT Guwahati hian tunah cheng vaibelchhe 250 senna tur, research project 407 a kalpui mek a, kuminah cheng vaibelchhe 50 hu, research project thar 82 an hmuh belh thu Biswas chuan a tarlang bawk.

Director Biswas chuan nikum khan IIT Guwahati-in consultancy project 119 a kalpui thu leh hemi atan hian cheng vaibelchhe 3.26 an dawn thu a sawi a, IIT Guwahati faculty te'n journal-ah paper 763 an tihchhuah thu leh paper 487 chu conference-ah an tihchhuah thu a sawi bawk.

HRD Minister Irani hian Assam Education Minister Sarat Barkataky pawh meeting a neihpui nghalin, state sorkar hnuaia zirtirtu thla hlawh la pek loh chu a bawhzui mek thu a sawi a, state sorkar chuan April leh May thla hlawh chu an pe tawh tia a tarlan thu a sawi. Irani chuan Barkataky chu district tina zirtirtu thla hlawh la pek lohte enfiah turin a hriattir nghal.