Meghalaya : Bangladesh mi pasarih ramri-ah man

Border Security Force (BSF) chuan Bangladesh mi, dan loa India ramchhung luhruk tum mi pasarih chu international border, Meghalaya-a East Jaintia Hills district-a Rattacherra huamchhungah an man.

BSF hian December 14 khan venhimna khauh taka an kalpuina hmun, ramriah Bangladesh mi ramri kana India ram luhruk tumte hi an man a ni. An mi mante thu an zawhfiahnaah Bangladesh mi pahnihin Taka 1000 in ramri an kan theih nan an puih thu an sawi.

An mi man zingah pafa, Mohammed Shahjahan (55) leh a fanu an tel a, Kolkata-ah damdawi lama inenkawlna a thlawna pek an ni dawn tih sumdawng mite hian an lo hrilh a ni. BSF hian a mi man pasarih tehi Border Guard Bangladesh (BGB) te kutah flag meeting kaltlangin an hlan nghal a ni.

BSF hian Indo-Bangladesh ramri, East Khasi Hill district huam chhunga Sonata, Dawki leh Kasinda-ah an phal loha sumdawng an man bawk. An mi man kut aṭang hian Rs nuai 9.83 man hu, bawng, chini, zu, dupattas, truck rim, biscuit, sangha, kuhva rah, alu, blanket, purun leh thildang an mansak. Heng bungrua hi Bangladesh-ah tawlh luh an tum a ni.