Assam: CM Sarma-a'n Bhutan National Day lawmna hmanpui dawn

Assam chief minister Himanta Biswa Sarma chu vawiin, December 17-a Bhutan National Day lawmna Changlimithang National Stadium, Thimphu-a neih turah a telpui dawn.

Chief Minister hi Bhutan lal, King Jigme Khesar Namgyel Wangchuk sawmna anga kal a ni. Nimin December 16 khan Bhutan hi a pan a, December 18 thleng a cham ang.

CM chuan Bhutan rama a cham chhung hian Assam leh Bhutan inzawmna tih chak leh tih ngheh zual dante a ngaihtuah dawn a, cultural exchange leh thawh hona ṭha awm theihnan hma a la dawn bawk a ni. Bhutan official-te chu hydropower siamna kawnga thawhho theih dan tur a sawipui dawn a, he sector-a Assam tana hamṭhatna awm thei tur te a ngaihtuah dawn a ni. Hei bakah Jal Sinchen scheme hman ṭangkai a, tui in tur project siam te, power generation a thawhho theihna tur kawng hawn nan hman ṭangkai a tum bawk.

Bhutan hian National Day hi an ram lal hmasa ber, kum 1907-a Gongsar Ugyen Wangchuk-a lallukhum an khum tir ni, December 17-ah an hmang ṭhin. A lawmna pui ber hi Changlimithang National Stadium ah an nei ṭhin a, ram chhung hmun hrang hrang aṭangin an kal khawm ṭhin a ni.