Sikkim : CM-in ST list-ah la awm lote dah luh ngei a tiam

Sikkim chief minister Prem Singh Tamang chuan Sikkim-a hnam 12, Schredule Tribe (ST) a la awm lote dah luh ngei tumin a kaihhruai sorkar chuan theihtawp a chhuah zel dawn tih a sawi.

Sikkim-a hnam 12, ST List-a la tel ve lote dah an nih theihna tura hma la tura din, State High Level Committee meeting hawnnaah Chief Minister hian telpuiin, hnam 12 te chu ST list ah dah ve ngei an ni dawn tih a sawi. Nakkumah an state-in state puiltinga hlankai a nih kum 50-na a thleng tawh dawn a, kum tam tak chhung hnam 12-ten ST-a dah an lo phut tawhna chu hemi huna tihhlawhtlin ngei a pawimawh thu a tarlang. "Heng hnamte hian Sikkim tan an thawk ropui em em chungin, kum 1979 aṭanga Scheduled Tribe-a dah an phutna hi ngaihsak an la ni lo," a ti.

CM Tamang chuan, chairman BV Sharma kaihhruaina hnuaia High Level Committee din chuan thla thum chhunga report rintlak siam a, bawhzui tur rawtna ṭha an thehlut dawn tih a sawi. Hnam 12-te ST list-a telh an nih theihna tura hmalakna hi a hlawhtlin ngei theih nan Sikkim sorkar chuan a theihtawpa thlawp zel a tiam tih a sawi bawk.

Chief Minister chuan committee member te leh stakeholder zawng zawngte an tum ti hlawhtling turin hna nasa taka thawk turin a fuih a, Sikkim mipuite tana hamṭhatna an siam leh dikna chanvo sorkarin a siamsakte dawng ṭheuh tura a duh thu a sawi a ni.