Assam : Online-a inbumna kaihhnawihah chargesheet 5 ziak lut

Central Bureau of Investigation (CBI) chuan online hmanga inbumna thleng kaihhnawihah Guwahati-ah chargesheet panga an ziah luh belh leh.

Official-te chuan investor-te chu sum deposit a, a pung tam tak pek tiama inbumna nasa tak a thleng niin an sawi. Hemi kaihhnawihah hian CBI Guwahati unit chuan mimal 16 leh company pahnih, Upepithets Holdings Pvt. Ltd (UHPL) leh Brahmaputra Sanchay and Biniyog Cooperative Society Ltd (BSBCSL) lakah thubuai a ziak lut a ni.

Upepithets Holdings Pvt Ltd lakah thubuai an ziahluhah, CBI chuan an director Hemen Rava leh Manager Sankar Saha te chu dan loa deposit scheme kalpuinaah an inhnamhnawih niin a sawi. "Dawt hmangin investor-te chu pawisa daha pung ṭha tak, thla khatah 6% leh a aia tama pek let an tiam a ni. Investor tam tak bumin, an sum dahte chu an mimal thil atan hmangin an ti chingpen a ni," tiin CBI thupuangtu chuan a sawi.

BSBCSL laka thubuai ziah luhah hian an chairman hlui pahnih Jiten Dek leh Himangshu Talukdar bakah branch manager Indrani Das leh secretary Sanjib Deka te hming tarlan a ni bawk. He pawl hian dan phal lohin deposit scheme an kalpui niin an tarlang. An scheme siam hi 'Grihalakshmi' tih niin, investor-te chu sum deposit tirin, kumtin a pung 15% bakah bonus pek an tiam. Mimal thubuai an siamsakte pawh dan loa deposit scheme siam hnuaia pawisa dah tir ṭhinte an ni a; UPI, cash leh cheque hmangin pawisa hi an deposit tir ṭhin a,Regulated Deposit Scheme hnuaiah engmah kalpui a ni lo. Mipuite bumin pawisa an deposit tir a, a pung chu sawi loh an capital pawh an pe kir leh lo a ni, tiin CBI chuan a tarlang.

CBI hian hetianga inbumna hrang hrang thlenga pawisa dahtute hming leh nihna kimchang pawh an chhui chhuak tawh tih an sawi bawk.