Nagaland : ENPO-in sorkar laipui rawtna a pawm

Eastern Nagaland People's Organisation (ENPO) chuan sorkar laipuiin Frontier Nagaland (FNT) chungchanga rawtna lailawk a siam chu a pawm.

December 13, 2024-a New Delhi-a ENPO, Nagaland sorkar leh sorkar laipui aiawhten meeting an neihnaah inremna hi an siam a ni.

Kumin August thla khan ENPO leh Ministry of Home Affairs (MHA) Committee chuan ENPO-in Nagland khawchhak lama state hran, Frontier Nagaland state siam an phut chungchang chu ṭum eng emaw zat an lo sawi ho tawh a ni. Hemi hnu hian an thil phut chungchanga rawtna lailawk, sorkar laipuiin a siam ngaihtuahin Delhi-ah meeting hi an nei a ni.

ENPO chuan thuchhuah siamin, "ENPO thil phut pui ber chu state hran, Frontier Nagaland siam a la ni reng a ni. Mahse tun dinhmuna sorkar laipui tana harsatna awm hrang hrangte thlirin, inremna lailawk atana FNT rawtna; Executive, Legislative and Financial Autonomy siam a rawtna chu kan pawm ta a ni," a ti. An thil phut chungchangah pawh inbiakna ṭha tak an neih theih zel an beisei thu sawiin, prime miniter Narendra Modi leh union home minister Amit Shah pawhin FNT rawtnaa an tarlante chu Nagaland khawchhak lam mipuite tana an tih hlawhtlin ngei an beisei thu an tarlang bawk.

Nakkum January thla tir lamah ENPO, Nagaland sorkar leh sorkar laipui aiawhte hian meeting an nei leh dawn a, FNT hnuaia ruahmanna siamte chu an tifel tawh dawn a ni.