Manipur : Police-ten KCP (PWG) mi 8 man tawh

Manipur police-te chuan December 14, 2024-a Keirak khuaa mi pahnih thah a nih kaihhnawihah helpawl, Kanglei Communist Party (KCP) – People’s War Group (PWG) mi leh sa pasarih chu Thawhlehni khan Kakching district-ah an man. Hemi hma hian KCP (PWG) mi pakhat an lo man tawh bawk.

Police-te hian Kakching district-ah hian an mi mante kut aṭangin ralthuam ṭhahnem tak an man tel. An ralthuam man zingah hian 7.65 mm Pistol pakhat leh a mu, ramchhung siam 9 mm Pistol leh a mu, .32 Pistol leh a mu, ramchhung siam 7.62 Sniper Rifle leh a mu, DBBL (Double-Barrel Breech Loading) silai pahnih, SBBL (Single-Barrel Breech Loading) silai pahnih, High Explosive Grenade pathum leh detonator pakhat, silaimu round 19, cartridge ruak pahnih, Baofeng handset pahnih leh charger, mobile handsets 10, lirthei (two wheeler) register loh pakhat leh thil dang chi hrang hrang a tel. Helpawl mi leh sa an mante hi Kakching Police Station-ah an hlan nghal a ni.