B'desh-in a mite tan ‘visa on arrival’ facility siam a dil
Bangladesh sorkar chuan Shillong kaltlanga Dhaka leh Guwahati inkar bus service-a passenger te tan Meghalaya, Dhawki-ah ‘visa on arrival’ facility siamsak turin Union Ministry of External Affairs (MEA) a ngen.
Bangladesh chuan hmarchhak bial state ṭhenkhat zin dawna ‘Restricted Area Permit’ neih ngai ṭhin chu hlip turin MEA a ngen bawk.
June 6-a Prime Minister Narendra Modi-a'n Bangladesh a tlawh ṭumin Dhaka leh Guwahati inkara bus service hi ṭan a ni a, bus passenger, Dhaka aṭanga Guwahati kal te'n India ram an luh hnua harsatna an neih avangin Bangladesh chuan restricted area permit chungchang hi India a sawipui a ni. Dhaka aṭanga bus-a kalte hian permit neih ngaite an neih loh avangin Guwahati-a hotel-ah thlen phalsak an ni lo a, sorkar laipuia thuneitute leh Bangladesh sorkar thuneitute an inrawlh hnuah chauh hotel thuneitute chuan thlen an phalsak a ni.
Bangladesh sorkar chuan July 1 aṭangin Dhaka-Guwahati inkara bus service hi pangngai takin kalpui a tum a, mahse passenger te harsatna sutkian a nih hma chuan bus service tir a tum lo.