NE-a Congress CM te'n Sorkar laipui sawisel

Hmarchhak biala Congress Chief Minister te chuan BJP kaihhruai, NDA sorkar chu sawi­sel­in, state hnufual zawk hmarchhak bial hmasawn­na tur dansakah an puh.

India rama Congress party Chief Minister te mee­ting Thawhlehnia neihah he thu hi Chief Minister te chuan an tarlang a ni.

Meeting hi AICC president Sonia Gandhi kaihhruaina hnuaiah neih a ni a, hmarchhak CM te chuan sorkar laipuiin Special Category status a titawp chu hmarchhak bial hmasawnnain a tawrh phah dawn a ni, an ti.

Congress Chief Mi­nis­ter te chuan Finance Commission rawtna anga state tinte ang khata en chu ṭha an tih loh thu tarlangin, hmarchhak state-in a chhiatpui dawn tih an sawi bawk.

NDA sorkarin Cong­ress party rorelna state te a enhrang bik nia sawi chungchangah Congress Chief Minister te meeting chuan a beihletna atana ruahmanna rintlak tak siam a rel.

Congress president Sonia Gandhi pawhin NDA sorkar chu mipuite hamṭhatna atana UPA sorkar thil ṭha tihte tihbo tumah a puh bakah NDA sorkar chu mi rethei tawrhna phena sumdawng hausa te tana hna thawkah a puh bawk.

India ramah hian Cong­ress party hian state pakua-ah ro a rel mek a, chungte chu- Kerala, As­sam, Karnataka, Hima­chal Pradesh, Uttarakhand, Arunachal Pradesh, Me­ghalaya, Mizoram leh Mani­pur te an ni a, Ke­rala leh Assam hian nak­kum-ah assembly inthlan an nei ang.