Bodoland state hran siam phut chhunzawm

Assam-a Bodoland Territorial Area District (BTAD) huam chin aṭanga Bodo hnam te'n state hran an siam an phutna kaihhnawihah Bodo pawlte leh sorkar laipuiin inbiakna an neih chu kum khat leh chanve dawn chawlhsan a nih hnuah Thawhlehni khan chhunzawm a ni.

Inbiakna hi Ministry of Home Affairs (MHA) Joint Secretary (North-east) Shambhu Singh-a'n a kaihruai a, Bodo pawl hrang hrang pariat aiawhte bakah Assam sorkar aiawh, state Home Secretary Mukti Gogoi leh Additional DGP Pallab Bhattacharyya te an tel.

Bodo pawl aiawha in­biakna telte chu All Bodo Students’ Union (ABSU), United Demo­cratic People’s Front, People’s Joint Action Committee for Bodoland Movement leh Bodoland People’s Progressive Front hruaitute an ni.

ABSU president Promod Boro chuan state hran siam dan tur chungchanga harsatna chinfel nan inbiakna kalpui leh chu a hun tawh thu a sawi a, inbiakna chu Union Home Minister level-a neih an duh thu leh, a lehpekah chuan Union Home Minister Rajnath Singh pawh tel ve tura an duh thu a sawi.

Bodo pawl aiawhte hian Union Home Minis­ter hnenah memorandum an thehlut nghal a, Bodoland state hran siam tumna chu sorkar laipui policy pakhata dah an phut thu leh Karbi Anglong district-a Bodo-Kacharis te chu Schedule Tribe (ST)-a dah an phut thu an thlen.