Vaccine lak hnua thihna thleng mithiam te'n chhui dawn

Tun hnaia West Tripura district-a Japa­nese Encephalitis (JE) vaccine lak hnua naupang pathum thihna thleng chu Union Ministry of Health and Family Welfare chuan member pali awmna, expert team a chhuichian tir dawn.

Expert team te hian Pathianni khan Tripura an thleng a, Thawhṭanni khan mitthi chhungte pawh an hmu nghal a ni.

Mitthi zinga pakhat, naupang kum 12 mi chuan May 23 khan JE vaccine hi an school-ah a la a, May 29 khan taksa peng hrang hrang hnathawh theih loh vangin a thi a ni. Naupang pakhat chuan May 25 khan vac­cine a la a, a hnuah sen­tut nat­na avangin Agartala Go­vernment Medical College (AGMC) dam­dawi-inah a thi a, kum 14 mi chuan May 27 khan vaccine hi la ve lehin, May 31 khan MRI Hospital, Kolkata-ah a thi a ni.

Naupang pathum thihna bakah hian midang 18 chu AGMC damdawi-inah enkawl mek an ni a, heng zinga naupang pahnih chu an dinhmun a ṭha lo hle tiin, state Health Service director K L Bhowmik chuan a sawi.

State health depart­ment-a official pakhat chuan chhuichianna an lo neih tawhah JE vaccine pek kawngah hian health department lamah thil fel lo an hmuh thu a sawi tawh a ni.

Expert team te hian JE vaccine petu, health worker te leh doctor te chu thu an zawtfiah ang.

Bhowmik chuan vaccine an pekchhuah ang chiah chu India ram state dangah pawh pek a nih thu leh complaint an neih loh thu a sawi.