Indian Army beihpui thlaknaah hel 15 kahhlum an ni

June 4-a Manipur Chandel district-a army convoy lam­bun­tute laka Indian Army-in Myanmar rama beihpui a thlak­naah Thawhlehni khan hmarchhak hel 15 kahhlum an ni a, helte hi 6th Dogra Regiment te lambun a, sipai 18 kaphlumtu, Nationalist Socialist Council of Nagaland (NSCN-K) leh Kanglei Yawol Kanna Lup (KYKL) helte nia an rin thu Army thuchhuak chuan a tarlang.

Indian Army commando te chuan sipai intelligence hnen aṭanga an thu dawn bawhzuiin, hel lakahhian beihpui an thlak tih Army thuchhuak chuan a tarlang a, Myanmar rama thuneitute hnen aṭanga phalna an neih hnuah helte te hi an luhchilh ta a ni, a ti.

Indian Army-a Additional Director General (Military Operations) Major General Ranbir Singh chuan Manipur-a sipaite lambun an nih hnuah Indian Army te chu inralring renga an awm thu a sawi a, helte chuan India ram chhungah pawikhawihna thlen leh an tum tih intelligence hnen aṭanga an dawn thu a sawi bawk.

"India chuan ramri chheh­vela remna leh muanna a ngai pawimawh a, India ram himna tiderthawng thei thil a thleng a nih chuan India-in a chhanglet zel ang," tiin sipai hotu chuan a sawi.

Maj Gen Singh chuan hel laka beihpui thlakna chu Nagaland leh Manipur-a India ramri chhevelah neih a ni tih a sawi bawk a, Thawhlehnia helho an kahna hmun chu Myanmar ram a nih thu leh thuneitute hnen aṭanga phalna an neih thu a sawi.

Beihpui thlaknaah hian Indian Army thi leh hliam an awm loh thu a tarlang bawk.

Sorkar laipuiin helte laka phuba lakna hlawhtling a ti

Sorkar laipui chuan hmar­chhak helte beihletna chu hlawhtling a tih thu leh helte thawhpui ṭhintu, ṭhenawm ramte hnena thu chah sawina a ni, a ti.

Union Minister of State for Information and Broad­casting Rajyavardhan Singh Rathore chuan he thu hi sawiin, "Hmarchhak helte laka Myanmar rama beihpui thlakna hi hel thawhpui ṭhin kan ṭhenawm ramte hnena kan thu thawn a ni a, inṭhianṭhatna leh sorkar laka helte beihletna chu a kal kawp zel ang, tun hi a bul

ṭanna a ni a, he thu hi mi zawng zawngin hre rawh se," tiin a sawi.

Indian Army Colonel hlui, Union Minister Rathore chuan sipaite chu huaisen a tih thu leh sorkar lapuiin Myanmar-a helte camp beih a phalsak chu lawmawm a tih thu a sawi bawk.

India khawthlang lam, Pakistan ramria helte chetna pawh tun ṭuma helte laka beihpui thlak anga beihlet a nih tur thu Rathore chuan a sawi.

NSCN (K)-in Indian Army thuchhuak chhanglet

India Army-in hmarchhak helte, Myanmar-a an inkulhna hmun an luhchhuah thu leh hel 15 an kahhlum thu an tarlan chu NSCN (K) chuan nimin khan Nagaland Post-ah thuchhuah siamin an chhanglet nghal a, Indian Army leh sorkar laipui thuchhuak chu thu dik lo a nih thu leh Indian Army tihhming-ṭhat tumna mai a ni, an ti.

NSCN (K) thuchhuak chuan Myanmar rama an camp chu beih a nih loh thu leh an mi leh sa thi an awm loh thu an tarlang a, thlamuang takin June 4-a sipai lambunnaa an mi leh sa thite vuina hun an hman thu an tarlang.

Khaplang-a kaihhruai NSCN helte chuan Indian Army te thuchhuak chu a dik a nih chuan a finfiahna atan hel an kahhlumte thlalak tarlang turin an phut bawk a, Indian Army-in television channel vela helte camp leh awmna bial an tarlan chu a taka awm lo a ni, a ti.

PLA helte'n

AR sipaite lambun ve leh

People’s Liberation Army (PLA) hel nia rinte'n Manipur, Ukhrul district-ah Thawhlehni khan Assam Rifles te an lambun ve leh a, darkar chanve vel an inkah hnuah helte hian an tlanchhiatsan. Thi leh hliam an awm hriat a ni lo.

Police te chuan helte hian Assam Rifle kea patrolling neite hi lo lambun an tum a, mahse an tum angin an hlawhtling lo a ni, an ti.