Assam : NIA-in ULFA (I) member Jahnu Baruah man

National Investigation Agency (NIA) chuan helpawl ULFA (I) mi leh sa, kumin Independence Day-a Assam-a bomb tih puahnaa inhnamhnawiha puh, Jahnu Baruah, Arnab Axom inti bawk chu Thawhlehni khan an man.

Baruah hi Chief Judicial Magistrate court, Dibrugarh ah Thawhlehni khan hrual nghal niin, hemi hnu hian thu zawhfiah turin NIA Guwahati office-ah hren zui a ni.

NIA hian Thawhṭanni zingkar aṭangkhan Assam police puihnain Baruah zawn hna hi an thawk a, Dibrugarh-a a chenna in an dapnaah pawikhawihna a hman ṭhin ralthuam leh digital device an man tel a, hengte hi enfiah mek an ni.

Baruah hi thu an zawh­fiah­naah state police-in Independence Day-a Improvised Explosive Device (IED) 11 an hmuhchhuah chu a kam ngei a nih thu a sawi. Heng device-te hi Guwahati-a Pan Bazar, Dispur, Gandhi Mandap leh Satgaon-ahte kam niin, ULFA Independence lawmna tih buaina tura an ruahman te an ni. An pawl hotu, self-styled commander-in-chief Paresh Baruah video kaltlangin an pawlin I-Day an boycott tur thu hi a sawia, an pawl thuchhuak zawm lo ten an tawrh tur thute pawh a lo sawi chhuak bawk.

NIA ten chhuizuina an neih aṭangin heng IED te hi ULFA(I) hruaitute kaihhruaina hmanga kam a nih tarlangin,hruaitu zingahhina Aishang Asom, Abhijit Gogoi tih pawh a tel thu an sawi. Jahnu Baruah hi kar khat aia tam enthlak niin bomb thawn chhuah leh a kamna kawnga thawh ber a ni tih hriat a ni.

Assam-a bomb tih puah tum chungchang chhuina hi September 17 khan Assam police kut aṭangin NIA hnenah hian hlan chhawn a ni.