Hmarchhak state pathumah PAP regime hmang leh dawn

Sorkar laipui chuan dan phal loha lut turte venhimna tih chakna turin hmarchhak state pathum- Manipur, Mizoram leh Nagaland-ah Protected Area Permit (PAP) regime hman a nih tur thu a puang.

PAP dan hnuaiah hian ram pawn lam mi, heng state pathum tlawhtute chu uluk taka enthlithlai an ni dawn a, Foreigners (Protected Areas) Orders, 1958 in a phut angin Protected Area Permit (PAP) an neih zel a ngai dawn a ni.

Union Ministry of Home Affairs chuan hmarchhak biala khualzin mite hip luh leh an tam theihna turin heng state pathuma PAP hman hi kum 2011, January thla khan a lo ti tawp a ni. Mahse kum 13 chuang hnuah hman thar a ni leh dawn ta.

Rampawn lam mi hmarchhak bial tlawhtute chuan PAP neih an ngai a, an tlawh theih hun chhung hi ni 10 niin pawhsei theih a ni bawk ang. Protected Area Permit hi Union Home Ministry leh state chhunga thuneituten an pe chhuak thei a ni.

PAP hman thar lehna state pathum zingah, Manipur-ah hian nikum May thla aṭang khan tualchhung buaina nasa tak chhuakin, mi za chuangin nunna an chan tawh a, mi sing tel chu himna zawngin an tlanchhe bawk.