Meghalaya: Anti-Narcotics Task Force PS hawng

Ruihhlo leh a kaihhnawih vanga sualna pung zel tihremnana State sorkarin Anti-Narcotics Task Force (ANTF) police station a siam chu hawn ani ta.

He police station hi Meghalaya Police Radio Organisation office, Golflink ah sak niin chief minister Conrad Sangma-a'n a hawng. ANTF Chief atan hian Jagpal Singh Dhanoa chu ruat ani a, Dhanoa hi Superintendent of Police, inspector te leh staff dangten an pui dawn a ni.

Sangma chuan ANTF police station chuan dan phalloh ruihhlo tawlhruk leh hralhna te a enthlithlai dawn a, tunlai khawl thiamna hmanga enthlak reng annih tur thu a sawi bawk. Hei mai bakah hian police station dangte leh general public chuan ruihhlo leh a kaihhnawih che vel chu an enthlak tur thu a sawi bawk. Police station chu duhthusamin la lian tawklo mahse ruihhlo do kawngah hna liantham tak a thawk dawn ani ati bawk.

ANTF chu dan leh thupek kenkawh kawngah mawhphurna sang tak a chelh dawn a, ruihhlo dona hmanrua chak tak ani dawn ani a ti.

Chief Minister chuan khua leh tui zawng zawngte pawhin ruihhlo umbo anih theihnan ṭan lakpui turin a sawm nghal bawk.

Meghalaya khawpui Shillong ah hian ruihhlo hmansualna a hluar hle. Security official-te chuan Manipur buaina vangin Shillong chu ruihhlo inhlanchhawnna hmunah an hmang nasa nia sawiin, ruihhlo hman khaw loh a tih hluar thu an sawi bawk.

Mahse CM Sangma chuan ruihhlo zawrh leh hmansual laka mipui an him theihnan police, health, social welfare department bakah tualchhung mipui nen thawk hoin hma an lak zel tur thu a sawi. Ruihhlo hmangsualte enkawlna hmun tur a awm thu sawi bawkin, state chhung hmun hrang hrangah rehab centre siam a ni dawn tih a sawi.