NSCN-K helte thawhpuia puhna China-in a pha Myanmar-in a ram chhungah India Army te'n beihpui thlak lo a ti
India media te'n Khaplanga-a kaihhruai, Nationalist Socialist Council of Nagaland (NSCN-K) helte thawhpui anga China chungchang an tarlan chu China-in a pha.
Chinese Foreign Ministry thupuangtu Hong Lei chuan India media te'n helte thawhpui anga China Army official te an puhna chu thu rinthlak lo a nih thu a sawi. "Ram dangte chhungkaw buainaah China chuan inrawlh a tum lo a, he ngaihdan hi tun thlengin a la pawm reng a ni. Eng ramah pawh ni se sorkar laka helte chu kan thawhpui ngai lo ang," a ti.
Hetihlai hian Indian Army te'n Myanmar rama inkulh, hmarchhak helpawlte lakah beihpui an thlak thu leh hel 15 chuang an kahhlum thu an tarlan chungchangah Myanmar chuan thuchhuah siamin, Indian Army te'n a ram chhungah beihpui an thlak lo tih a sawi.
India media te chuan Manipur ramri aṭanga Myanmar ram chinah India Army te'n Thawhlehni khan beihpui an thlak thu an tarlang a, June 4-a Manipur, Chandel district-a 6th Dogra Regiment sipai 18 thihna thlentu nia rin, NSCN (K) helte lakah hlawhtling takin beihpui an thlak tiin an tarlang.
Myanmar presidential office-a director Zaw Htay chuan thuchhuah a siamah Indian Army te hian India ram chinah beihpui an thlak thu an tarlang a, Myanmar chuan a ram chhunga hel inkulhte chu hum a tum loh thu a tarlang bawk.
Thein Sein-a kaihhruai Myanmar sorkar chuan NSCN (K) hel nen hian kum 2012, April 9 khan inkahhai thuthlung an lo ziak tawh niin an sawi.
National Security Advisor (NSA) Ajit Doval chuan hmarchhak helte laka ṭangruala beihpui thlak dan kawng zawng turin Myanmar tlawh a tum thu Nilaini khan a sawi.
Doval chuan hmarchhak hel, Myanmar rama inkulhte lakah India-in beihpui thlak chhunzawm zel a tum thu sawiin, hemi atan hian Myanmar thuneitute biak a tum thu a sawi a, Myanmar ram hotute leh Myanmar Army official te chuan thawhhona ṭha an neih thu leh an inbiakpawh reng thu a sawi bawk.