Assam tuilian mi nuai 2 velin tuar

Ruahsur nasa avanga Assam-a tuilian chu district 13-ah mi nuai hnih velin an tuar tawh niin state sorkar official chuan a sawi a, Sonitpur district-ah mi 200 chuang relief camp-a an awm tawh thu a sawi.

Thawhlehni aṭang khan Assam hmun hrang hrangah ruah a sur nasa hle a, hei vang hian Baksa, Dibrugarh, Kamrup, Barpeta, Sonit­pur, Dhemaji, Lakhimpur Tinsukia, Darrang, Nalbari, Golapara, Jorhat leh Kamrup (Metro) district-ah tui a tilian a, khaw ṭhenkhat chu tuiin a chim vek a ni.

Assam State Disaster Management Authority (ASDMA) chuan thu­chhuah a siamah tuilian hi mi 1,95,243-in an tawrh thu a tarlang a, khaw 533 chu tuiin a chim a ni, a ti.

State sorkar chuan chhawmdawlna leh chhanchhuah hna awlsam zawka thawh a nih theih nan toll free phone number a siam a, State Emergency Operation Centre number 1070 leh District Emergency Operation Centre number 1077-ah harsatna tawkte chuan biak tur a ni.

Sorkar official chuan tuilian hian leilet, hectare 8,245-a zaua, thlaite chu a tichhia tiin a sawi.

Revenue and Disaster Management Minister Bhumidhar Barman leh Water Resource Minister Basanta Das chuan tuilian thlen dante ennawnin Nilaini khan meeting an nei nghal a, district thuneitute chu tuilian laka indan dan ngaihtuah turin a rang lama che chhuak turin an hriattir bakah chhawmdawl hna thawhna atana ṭangkai turte ngaihtuah turin an hriattir bawk.